Farg‘ona viloyati Yozyovon tumanidagi 6-umumta’lim maktabida bitiruvchi yoshlar uchun o‘tkazilgan “Ochiq dars” nafaqat oddiy uchrashuv, balki kelajak sari ochilgan muhim eshiklardan biriga aylandi. Ushbu tadbir yoshlarning kasb tanlash yo‘lidagi ilk qadamlarini mustahkamlash, ularni zamonaviy energetika sohasi bilan yaqindan tanishtirish maqsadida tashkil etildi.

Dars davomida “Farg‘ona HETK” AJda faoliyat yuritayotgan malakali mutaxassislar ishtirok etib, o‘quvchilarga bugungi kunda energetika tizimida yaratilgan zamonaviy ish sharoitlari, ilg‘or texnologiyalar hamda ayniqsa, xotin-qizlar uchun yaratilayotgan keng imkoniyatlar haqida batafsil va hayotiy misollar asosida so‘zlab berdilar. Bu esa yoshlar qalbida ishonch va qiziqish uyg‘otdi.

Uchrashuv davomida o‘quvchilar elektr energiyasidan oqilona foydalanish, energiya samaradorligini oshirish, qayta tiklanuvchi energiya manbalarining ahamiyati haqida muhim bilimlarga ega bo‘lishdi. Shamol va quyosh energiyasi kabi zamonaviy yechimlarning bugungi va ertangi hayotimizdagi o‘rni sodda va tushunarli tarzda izohlandi. Bu bilimlar yoshlarning nafaqat dunyoqarashini kengaytirdi, balki ularni mas’uliyatli iste’molchi va kelajak bunyodkori bo‘lishga undadi.

Tadbir yakunida bitiruvchi yoshlarga korxona nomidan kitoblar topshirildi. Bu esa bilimga, ma’rifatga bo‘lgan e’tiborning yana bir yorqin ifodasi bo‘ldi. Zero, kitob — bu kelajak sari yo‘l ko‘rsatuvchi eng ishonchli yo‘ldoshdir.

Mazkur ochiq dars yoshlarning qalbida yangi orzular uyg‘otib, ularni energetika sohasiga qiziqtirish, kelajakda ushbu yo‘nalishda yetuk mutaxassis bo‘lib yetishishlariga ilhom bag‘ishladi. Shubhasiz, bugungi uchrashuv ertangi kunning malakali energetiklari uchun muhim poydevor bo‘lib xizmat qiladi.